TORRADAS

Dae su jannil'e domo mia
fissaio una lughe , s'intrinu indeoradu
e cun sa rena in manu
annajaio sa carrera chi cabulaiat infinida
a pettus de me, acchicchiende cantidos
de dies benidoras, notas bidrinas.
Abbrazzaio sos benujos lestrittos
a amalo su entu furiu, sa frina.
Su sulu friscu 'e sa ucca divina
m'aundaiat de biadia . Pustis,
a ojos criadureddinos, distinghio
sa mudria 'e sas pedras, isterridas
a su lugor'e anniccadas lanternas.
Intendio s'iscuru cando
iscanzada sa pibirista istracca mi sinnaio
e nde sighio su passu ansiosu fin'a su sonnu,
fin'a su sole chi ch'isciompiat s'avriu .
E fit sa die a mi ninnare
in sas nues e in su risidu arcubalenu.
Mi doliat s'ingannu 'e pizzinnia.
Cuscujaio a sos fiores d'eranu:
ispijendem'in cristallos d'eddia
cun unu sulu s'isparghian in s'aèra.
Ma corno, dae ora in ora,
mirende su matess'intrinu
mi creschet una tatta istracchidudine
a s'umbra 'e serentina cando cara
istringo sos benujos siccos,
serrende lughelughes in pettorra:
dansana donosas a sa muda ...
accunortan sos longos mios silenzios.