TEMPII A L'EVVESSU

Passu poi di passu
aggiu ficchidu

i l'óru di la me carréra
li prédi di misura
d'una longa esisthenzia.
Abà chi più nudda
chistha mi pruponi

chi più nudda àggiu d'intregà
a sònnii e disizi

pigliu gusthu a volthi
a turrà a vibì chiddi passadi
fendi a l'invessu lu caminu:
un apentu innuzzenti.
Cumenti ischuminzà una dì
da li curthini inzerthi di la séra;
vide lu sòri pisassi da chisthi
e curchassi poi i lu lettu di luzi
ch'ipaglini li fiori di l'Aurora:
un'illusioni rara...
o un apentu
appuntu

cun un pogu di marincunia.
Cunniscì la passioni piena
primma di lu batticori chi ti poni
una cara dibessa da tutti: noba!
E poi lu piazéri di gioghi luntani
Cunfusi cun fantasì sìmprizi di criaduri
finu a la titta di mamma;
a lu mamentu mìsthigu
i lu ca calchunu ha siminadu
i lu bugiu mistheru d'una ventri
la tó sorthi.

Ma poi parchì?
Si da cassisia mamentu ischumenzi
veni sempri a lu nudda?


Autori: Palmiro De Giovanni
Nadu a Sassari lu 9 d'Abriri di lu 1922
Residenti a Sassari in Viari Caprera n° 1C
Terefonu 079 292 100