SA VERIDADE


S'omine ch'est de animu sinzeru
vivet onestu
affirmat su giustu

finz'in fattos chi ponene disgustu
mai negare ischit su ch'est beru;
tenet sa veridade in cunsidèru
pro sensu 'e dovere
no pro gustu;
est dottrina appresa da-e minore
chi finz'a mannu li faghet onore.

Mentre inue su giustu si negat
sempre sa veridad'est costoìda:
sa gianna aberit a sa mala-vida
chie su tortu pro derettu allegat

in ingannos e faulas s'annegat
a bortas zente nobile
istruida.
Ue b'hat veridade manifesta
est garanzia pro sa zent'onesta.

Veridades bi hat chi dàn fastizu
a chie brutta tenet sa cussenzia

pro chi ladina siat s'evidenzia
nde 'ogan milli contigas a pizu;
de mascarare su giust'han disizu
immeritàda chirehend' indulgenzia .
Poveros de morale e de carattere
sa culp'issoro la cheren dar'atere.

Zertos chi veridade no nde naran
serran de ojos e bistan chietos

ca timen chi lis fettana dispettos

gai che surdos e mudos si paran;
da-e minores sa maliscia imparan
a si tenner in coro sos segretos

forsi timende ch'in venditta ruan

però de veridade no nd'aggiuan...

Si 'e veridade sas difesas leo
est ch'a derettu sa mente m'ispirat...
Gai ognunu chi su giustu ammirat
finz'a morte la sigat pens'e creo.
Comente insistìdu hat Galileo
cando hat nadu chi sa terra girat;
narat sa veridade a boghe manna
e non timet minetta né cundanna.


Giovanni Soggiu
Nato a Bonnanaro (SS) 17/07/1934
Res. Alghero Via
Mazzini 141
Tel. 079/950801