LAGRIMAS

Sas penas de su mundu sunu tantas
e minores o mannas dan dolore;
Ognunu nde connoschet su sabore,
ognunu nd'hat proadu chissà Cantas.

Su signale lu dada su piantu,
visibile chi siat o frenadu
e lu movet su coro angustiadu
cando b'est su motivu e b'est su tantu.

Su pizzinnu, ch'idimus allattende,
cominzat subitu a si lamentare
cando su latte l'enit a mancare
e no hat mai pasu, pianghende.

Custu pizzinnu, poi, mannitteddu,
in piantu,si frigada sos ojos:
No s'ischit cantos sunu sos torojos
in cuss'edade sua, mischineddu!

Ecco in iscola lu faghen andare
accumpagnadu cun bonos cunsizos;
e arrivin,a s'ora, sos fastizos,
cun piantu diffizil'a calmare

Poi si nd'enit s'edad'e s'amore
cun palpitos segretos e suspiros,
ma primm'e ider sos coros unidos
b'hat oras de piantu e de dolore

Non l'hat mai sa femina indebadas
su donu ch'est pro issa su maridu
ca daboi su tempus est cundidu
de piantu, cun lagrimas cuadas.

Cussas, chi sun versadas a s'accua
sun abbundantes chi parene venas;
e non sun tottu ch'ischini sas penas
chi passat una mama in vida sua.

No pro niente custu nostru mundu
est un'adde de lagrimas giamadu
si narat a motiv'e su peccadu
originale. Misteriu profundu

ch'in tott'ue bi siat su piantu,
nott'e die cun tuncios a dogn'ora
in sa domo serrada, o cando fora,
in su camin'o intr'e Campusantu

SU PASSADU M'EST PRESENTE

LIBERADU DA-E MALE

Lontanu tantos annos so istadu
in sa terra jamada Continente:
unu mundu diciosu e attraente
pro sos divertmentos fentomadu.
Però su logu meu tantu amadu
in d'un'angul'e coro fit presente.
Una visit'a s'annu che faghia,
prommiss'antiga fatt'a mama mia

Sa licenza fit meda disizada
e' sos meses fin longos a passare;
ma daboi de tantu suspirare
beniat cudda notte sonniada
de fagher sa famosa traversada,
ninnadu da-e s'unda de su mare
già pensende a su mese de reposu
cuntent'e lu passare in paghe gosu.

Tando sas dies fin de libertade
avvicinend'amigos e parentes,
istimados o puru indifferentes
da tottu ischis calchi novidade.

SU PASSADU M'EST PRESENTE

MAl CUNTENTOS

Su poveru disizat d'esser riccu,
custu,poi,si cheret sempre sanu.
Chie trattat sa zappa chilcat pìccu
su pizzinnu si cheret anzianu;
e tottu si nd'ischidan su manzanu
de malumore pro calchi pinniccu.

Chi est nanu si cherede gigante,
non bastat unu ticcu a su sididu;
sapiente si cheret s'ignorante,
e sempre attatu cuddu ch'est famidu.
A una non li bastat su maridu
e pro cussu si faghede s'amante

S'omine si disizat in sa luna
(e cun su tempus b'hat a resessire).
Bi sun cuddos chi chilcana fortuna
in terra anzena, e andan'a patire
e meda oltas enit a finire
chinoghe si nde torran, tott'in d'una.

B'est calecunu chi ciambada sessu:
ecco s'omine femina diventat,
tottu pro meritu de su progressu,
ed sa femina mancu si cuntentat.
"Cust'est calchi duttore chi s'appentat
narat sa zent'in bidda,"cessu, cessu!"

A tottu paret sempre troppu dura
sa ch'in su mundu si jamada sorte.
A su ch'est in su lettu ed est in cura
su dolore li paret meda forte.
E forsis a daboi de sa morte
si disizat diversa sepoltura!

SU PASSADU EST PRESENTE