Edeu...

E deu
e deu amori seu.
Seu s'acua de su nascimentu.
Seu pimpirina de arrosada de universu.
Seu folla de atongiu chi bolat in su bentu

chi bolitat in sa boxi de is undas de sa vida

chi sicada
si fait pruini pò torrai a nasci.

E poi
amori de amori seu

fillu de cussu basu mannu
chi Efis hat donau a mamai
candu
ascurtendi sulidus de mari

si carignaiant is pilus cun is manus

is labis cun is labius.

E deu
e deu amori seu.
Seu is alas de Cupido
chi in lampus de poesia tocant su coru

tocant su coru a debilis e balentes

a is animas in pena e a is animas in gherra.

E deu
seu durciori deu.
Seu durciori
ermosura de sonus e fueddus
chi bivint in sa carrela de su tempus meu

de custu tempus
chi est sempri sentz' 'e tempus
e nascit e morit e torrat a nasci
in su caminu de is isteddus chi

luxi de luxi

andant arendi moris de armonia.

E imoi
innia e innoi
amori seu.
Amori po sa rima chi sanat maladias

amori po su versu chi bincit tirannias
e tìrrias e avolotus e disamistades

amori po su mundu

poesia de poesia.


Gianni Maxia
Ca 24-06-'58
Via Scornigiani
32 09121 Cagliari
Tel. 070 25 50 48