Disterru

Innidos passos
innidos camminos
po jumpare a cudd'ala...
Bae in ora mala!... Fuìa s'est sa groria.
Negao sa timòria
po no intende'
s'anima chi mossende m'in sos canes.
Siat Maleditta s'illusione mia!...
Chi in terachìa
sa zoventude at postu
sighinde unu dilliriu de ingannos
chi sos annos de tando at populau
d'ingabberas pàntamas.

Che unu telu chi pèrdidu at sas tramas
atzaccuau dae milli temporadas
làssinat s'umbra mia
in d'una terra chi no at sapore
e chircat sa tremulìa de coro
d'una torrada chi no acattat prus
in s'anima isperrada
tra tancas assuttas
e alluttas carreras de vida.
Colan sas aspras seddas
e sos candidos prados d'iscraria
donnia notte in su propiu 'isione;
sos isteddos mi jaman
su chelu pranghet
ca apo pèrdiu s'addròmu
chircande sas sirenas d'atterue.


Sonnio dae Neddùe
de ghirare una die
a su locu inue naschin sos amentos
cando connottos bentos
an a toccare su canticu'e s'incontru
cando s'arburìnu est unu pessu
in palas de su monte
e pèrolas in fronte
su selènu
est ponende a sa feras;
cando prus durches paren sas aèras
cando in predas de mare
jochittana sas undas a sa sola
e s'arcanu 'e sa terra e de sas abbas
paret galu su miu.