Africa...un inferru


Signores de gherra e de retzelu
a manappare cun su malutempus
cheren abbenenare terru e chelu
cumbissos chi nd'essin binchidores.

In d'unu gherra gherra de etnìa
cheren derramare su Ruanda.
Pro abbare de samben su terrinu
colan a ferru e fogu su Burundi
e degoglian sas carres a s'Uganda.

Tres pobulos in d'unu fadu ebbìa
che a fizos de una sola mamidda
benin accumonados in frazellu
in d'un inferru chena finitìa.

Paren dende manu a su siccore
de sas malas annadas chena contu.
A irrujare 'alu 'e pius sa terra
chi est pro natura semper ruja

si bi annanghet su samben de sa gherra.

E-i sa zente fuet isprammada
simizantes a upas caminantes
chena chi tenzan briu de mutire

non han sentore de terra prommissa
imperò tuccan
tuccan chena uè ischire.

Si lis est fatta curtza sa vida
siat a mannos che a piseddos
comente chi non sian rese umana.
Meda fizos non lompen a sos annos
chi potan ischire da-e perissos
chi abbéru: "su puleddu non bolat"!


Franco Dedola
Sorso