VALORE DE S'AMISTADE


Che-i su pane chi dat s'alimentu
s'amistade dèt s'omine nutrire

ma in su modu de dar'e rezzìre
non si podet leare pro appentu...

S'omine chi mantenet s'amistade
est sentidu chi l'enit da-e coro
e la tenet a bantu pro decoro

ca inue b'abbundat est fortuna;
sas Nassiones lènd'una pro una
cun issa tenen pagh'e libertade.

A bortas osservende sos potentes
bidimus ch'in totue la trascuran:
ca sos mannos la pesan e mesuran
a segundu ricchesas chi possedin;
paga nd'hana e paga nde cunzedin

hana che cane su velen'in dentes.

Pagu 'alen podere né ricchesa
si mancat s'amistade da-e domo;
nd'hamus proas innanti de-i como
chi sol'odios semenan e brigas;
totu lis paren caras inimigas
de front'a issos a fagher offesa.

S'amistade non cheret interessu
sende sinzera
de sentidu sanu

nobile donu 'e su gener'umanu
e contat pro sos sabios virtude

finzas a zente dura
ruzz'e rude
l'hat milli benefizios cunzessu.

In sos caminos in paghe prozedit
s'amistade
ca est fraterna ghìa

funtana 'e dignidade pro nadìa
chi hat sempre sos populos unidu;
in sos coros suaves faghet nidu

ma chi la sigan in cambiu pedit...

Dominet s'amistad'in dogni tretu
ch'iscansat brigas e discussione:
che conduit sa zent'a sa rejone
ca est garbàda hat cussu podere

ma de tenner hat sempre piaghere
sinzeridade
amore
affettu.