UNA CIURRATA NOA
(Gallurese)


Illa 'inturaglia di lu tarravrinu
v'è
di la solti
lu passagghju alcanu:
éu no sapia ch'éran'illi guci
d'unu stazzu spaldutu

li dissigni di luci
chi la mimoria moi
calchi volta

da li trami fruniti
di spiranzi passati.
Dissigni nati in macchj di listìncu

sighendi 'n bolu céddhi banduléri
chi punìani l'ali a lu trabaddhu:
pintùri pa la menti d'unu stéddhu

pa lu so' briu ispaltu illa campagna
cu li so' 'jochi in boci di nattura

ammenti pa la 'ita cantu dura.
Ch'anda dugnunu cu lu so' 'intìnu
e lu passu affattenti a lu caminu

miscendi sempri dugna pinsamentu
insembi cu la risa e cu lu pientu.
Ma illa paci silena di la séra

in ruiura di soli ch'è calendi

sonnii adducati
divintati fola

pìddhani folma com'e immagghjnendi
dissigni chi
faltata dugna proa

agattarani una ciurrata noa.

Autore: Piero Canu