" TRAMUNTANA"

Su bentu de is zonas
De is polus fridus,candu
lompid' a terras bonas
Temperàdas a brandu,

Toccad erbas e mattas
Cun perigulu mannu,
medas operas fattas
Suttaponid' a dannu;

Meurras e isturrus
Portad a penitenziaE
Spaccad manus e murrus
Cun pagu riverenzia;

Cun sùldu seccanti
Currid' in su stradoni
E brintad arroganti
In dognia furrungòni;

Allisad'is mureddas
Imbistid is arroccas
E arziad'is gunneddas
De beccias e piccioccas.

Est cosa,cuctu bentu,
Chi faid vituperiu
A su drollu, a s'attentu,
A su maccu, a su seriu.


Ma, forza naturali,
Po tottu si spresonad.
Passendu e fendu mali
Nudda e nèmus perdonad.

Imparziali araxi
Pungid in custa terra
Chini disiggiad paxi
Chini pretendid ghèrra


E,in bella libertadi,
Sola tra is prus sòlus,
Cun tranquillidadi
Nci torrad'a is polus.

Cudducoru"

" AIAIU"

De antigas canzonis oh maiu
Pru de dulci risonanzia
Oh frori teneru de su vivaiu
Chi bincis dogni bixinanzia

Nebodi chí nascis: oh raiu
Chi mi ponis in cunfianzia
De su titulu de "aiaiu"
m'aumentas in importanzia

Comenti mancu mi seu bistu
In s'edadi spenzamentada
Felici cantu e assistu
A sa tua presentada
Scarescendu dognia tristu
Sonnu de sa vida passada.

" Cudducoru "


"CAMPANA DE PASCA"

Campan'e Pasca,sprazzina su sonu
Tottu campad' aundi cristianu
De amori,de paxi e de perdonu
Movendu su sentidu forti e sanu;

Sa boxi tua passid che a donu
Annuddader , 'e su sensu marranu
Po chini bivid in superbu tronu
Po chini sufferenti est fittianu.

Campana sona e non ti tocchid manu
De chini parad cun animu vili
Lazzus in su camminu de s'umanu.

E accumpangia si de-i cust'abrili
Po attras Pascas in atru Beranu.
Giustus finzas a s' ultimu quili (1)

(1) Cimitero.

"Cudducoru"