SU TERRORISMU

Hoi su terrorismu fueddu de morti
est intrau in sa moda de s'umana vida

ddu timint totus e po mala sorti
no làssada scampu a sa dispidida

cumprit sa partida-cun disperazioni

a sa religioni-poi donat sa curpa

lassat genti zurpa-o meda sciancada

trista e strupiada-po dda fai penai.

Po dda fai penai sen' 'e cumpassioni
pagu 'ndi dd'importat de sa dignidadi

no scerat nisciunus pigat su muntoni
pipius e anzianus no castiat s'edadi

cun cruelidadi-boccit in s'istanti

bastat chi su tanti-'nd'assichit sa genti

po fai a comenti-ordinat su mali

tristu generali-postu a cumandai.

Postu a cumandai fanatica genti
cunvinta de tenni'sempir'arrexoni

promittit su celu e ingenuamenti
medas inci creint fendi distruzioni

no 'nc'est soluzioni-dda teninti binta

sighendi sa pinta-de is malafatoris

bolint ess'attoris-de ponni in giornali

po issus su mali-est cos' 'e ammirai.

Est cos' 'e ammirai fattu cun coraggiu
boghend' arrexonis senz' 'e fundamentu

no scint ita siat s'offes' 'e s'oltraggiu
issus sunti prontus in dogna momentu

est unu turmentu-su depp'abettai

su deppi'circai-sa genti cuada

cun giura votada-a fai su martiriu

postus a ingiriu po s'assassinai.

Po s'assassinai ddu nanta cun feli
cundennendi puru finzasa s'ebreu

a su cristianu nendiddi infideli
e cussa indiana tenint a ispreu

deu su misereu-ddi s'hia arresai

po fai cessai-totu su turmentu

hem'essi' cuntentu-s'in su benideru

s'Omini sinceru-podessit regnai.





NOTA: Antica forma di poesia cantata campidanese
detta "a Curba"- Utilizza il dodecassillabo nei
primi quattro versi in rima
il doppio senario
a rima incatenata nei successivi quattro versi



Sergio Medved
nato a Senorbì il 7/7/1943
residente in Via San Gerolamo
8
09047-SELARGIUS (CA)
Tel.070/846442