SAS FEMINAS DE OTIERI

Aeras lughidas de 'eranu
amantziosa fieresa jighen in benas
pro su donu mannu 'e su sentidu
e su cabu in su faeddare.
In sos istrobbos donzi die
sas feminas de Otieri
sunt che rundineddas in bolu
armonicas in calesisiat chelu.
E ant lieridade ispessada
in sos ojos de bellutu
si cumbidan a sas prendas
de sos misterios insoro.
E ischin bischigliare
sas feminas de Otieri
a modu e manera
chei s'abba ostinada
chi movet carignende
sas pedras de su riu.
E ant s'alenu nuscosu 'e sa vida
su mover a s'impignu detzisu
sa grascia 'e sa veridade
a triunfare a coro in manu:
parent navigheddas ispatziales
in s'illacanadu 'e sos arcanos
chi s'apotentant de su nou
de su ben'ennidu tempus benidore.
Est de Otieri sa femina mia
e mi faghen corona
sas tremidas suas de ammaju
sos risitos
sos iscacaglios suos
de gosu e de piaghere.