SA DELINCUENTZIA

Sos riccos meda tenden a timire
sa zente mala de che los furare
ch'a malaoza los faghen pagare
sos ladros pro si poder irricchire.

Su ch'este malu pretendede troppu
a fagher dannu non bi ponet frenu
faghet de tottu pro aer s'anzenu
finamentra ch'arrivit a s'iscopu.

S'assegurat ch'est unu benistante
chi ada meda dinaris in banca
lu tentat solu li 'ettat sa franca
che lu cuat che unu latitante.

Daghi l'at in manu est soddisfattu
si su colpu non l'andat a contrariu
pro esser isse su miliardariu
a minattas pretendet su riscattu.

Intro de una gratta che lu attragada
in s'iscuru bendadu e suttammissu
si faghet dare su chi cheret issu
lu minattada a molte si non pagada.

Este de sa familia su drama
chi a l'intender solu dat paura
domandan mizas foras de misura
si cheret bider fizos babbu e mama.

Ana su coro che-i su leone
zente chentza peruna piedade
no an rispettu de s'umanidade
si non pagan bocchin sa pessone.