Mohamèd


Cant'annus teniast(a) Mohamèd
candu sa balla t'aiat trapassau?
In bratzus(u) babbu t'aiat artziau
cun lagrimas medas de febi
t'aiat portau a s'altari
trogau cun bandieras pintadas.
Doxi annus teniast(a) Mohamèd
cumenti a su fillu chi apu criau.

Cant'annus teniast(a) Mohamèd
candu de domu ti fiast(a) fuiu
su mundu penzendi de podi acafai?
Ci fiast(a) ghetau a su mari
i' boxis malinnias sighendi
circhendi me in s'undas fortuna.

Ti fiast abbrancau a sa rocca
candu su mari si fiat trumbullau
pedendi perdonu implorendi piedadi
po curpas mai cumitìdas.
Lamadas t'aiant allupau
intruxas po sempri famìdas.

Cant'annus teniast(a) Mohamèd
candu in sa strada t'aiant(a) lassau?
T'aiant(a) donau tres soddus de prata
fadendi promissas de gosu
losingus po si spassiai
in domus de lussu pudescias.

Portast(a) su 'istiri 'e sa festa
candu su coru t'aiant(a) spollau
su 'istiri chi mamma t'aiat preparau
cosendi cun cantus de amori
sonnendi is isteddus de oru
po fillu de mamma stìmau.

Dox'annus tenist(a) Mohamèd
candu su mundu t'aiat refudau.
In bratzus(u) babbu t'aiat artziau
cun lagrimas medas de febi
t'aiat portau a s'altari
trogau cun bandieras pintadas.
Dox'annus teniast(a) Mohamèd
dox'annus teniast(a) Mohamèd.