LAUDE A SA BANDELA NOSTRA

Salve!.. Bandela!... Bandela magica!..
Simbulu de sa Terra sarda.
Vela candida
ispijada a tottu sos bentos.
Salve! pannu rugadu in ruju

nos ammentat su samben
donadu pro sa soperanidade
dae sos fizos prus fortes
de custu Populu antigu

eredes de sos prodes
gherrieris nuraghesos.
Sos battor Moros?
Sunt figuras ieraticas
ch'attestant sas gherras
sambenosas cumbattadas
in tottu sos tempos
in nument de custa Terra
imbidiada e chertada.
Salve!.. Insinnia ch'impessonat
ideales nobiles e cundennat
sas memorias ranzigas
imprentadas in s'istoria nostra.
Emblema chi muntenet altos
sos tonos de sa sardidade
e de sa dinnidade.
Sienda diosa de un'erenzia
ch'est fiera 'e si nudnre con s'alenu
'e custa Terra istregada
Salve!..Bandela!.. Bandela magica!..
Alta e solenne supra a tottu.
E accò lomper a sos sensos nostros
s'ecu de unu missatzu giaru e forte:
Sardos! Bistade semper istrintos
attundu a cust'insinnia istorica;
no ismarredas s'eredidade
ligada a sos valores
de s'identidade e de s'unidade.
E s'ischidant in sos coros nostros
Sos sentidos patriotticos prus calidos
Salve!.. Bandela!.. bandela magica!..
Salve!