L'isula chi v'è

E i li reni sulitari

candu da viola in rosa l'aria volta
e ghjà la lugi azzurra
badda i l'odorosi suspiri
chi da evi cheti o nirvosi s'àlzani
e si spàglini
chi più m'intengu
aggranfaddu a chista terra.

Silenzi
pagi
sensu d'infinidai

candu lu soli stirri li so' ali.
Terra
isula
fiara

scavu a cumpuddassi l'anima

no solu scogliu inghiriaddu d'eva!

Si i la bruma mi s'abbri la stirrudda
di lu mari mi scioru

e la premmusìa cumprendu faddali
di canti circadda l'hani e audda mai.
Mi piglia tandu un impiddi d'orgogliu

e mi piagi videmmi
ancora scogliu arresu i li currenti.

Eu no vogliu dumani chena
ogghji
né ogghji chena arrimani

eu vogliu un'isula
cun drentu l'anima undi
no mòrghia mai l'amori
pa' edda matessi!

La lugi ghjà trinigghegghja
i l'ariggi di la sera
ariggi
d'eva chi ci sipara e ci divenza

candu l'umbrori falarà
ci sarà mimoria la marizzadda
chi spigni lu sonniu a no murì.
Semmu isulani
noi matessi isuli.


Giuseppe Tirotto (Castelsardo 19/12/1954)
07031 Via Dei Mille 7/a Castelsardo (SS)
tel 079470883
3293917457