Disisperadu sonniu

E b'ap'apertu dies
truncandelas dae costas de sa notte
chin arrodau trintzette
chi corzos e sonnios sestaiat.
Donnia tallu unu bisu.
Donnia puntu 'e corrìa
in sa taschedda chin sa mesu luna
fit unu passu in s'andala 'e su cras:
andao in custa terra
che nichedda 'e sisinu
in su frumene mannu 'e su 'inare
chi abbat solu sos ortos de sos riccos.
Forte chene malissia
no intendio fatiga
chin sa rìsida luna po pandela
e una vela
chi affannosos bentos an ispintu.

Zovanos bisos mios
chi mai son frorìos
bantzigan in s'arvore 'e sa corte
che fruttos de sa sorte
chi si trozican in s'urtima agonia
tra attittos de muscas fastiziosas
chi cambian ditzosas
sa morte chin sa vida
in d'unu ballu tundu
chi contat s'andamentu de su mundu.

Como
chin sas ispettas manos
miseras de fortzas e gabales
semeno 'alu granos de ispera
nudricandemi un'urtima chimera
e unu pessu 'e sole
chi jumpat affannosa
su riu misteriosa
chi a su coro lavat sos anneos;
disisperadu sonniu
chi 'olat prus in artu de s'ostinu
e innossente e forte
chircat su cojuvìu tra vida e morte.