1° Poesia

A SA MADONNA DE SU RIMEDIU

Ses Tue sa Divina protettora
fiza e mama de su Redentore,
eletta dae su Deus criadore
e pro s'umanidade Alta Segnora.-

De ogni grazia ses dispensadora
piena de puridade e de amore,
chi a s'afflittu sanas su dolore
e assolves sa gente peccadora.-

Faghe ispuntare sa novella die,
chi mi rendat cust animapulida
pro t ' adorare cun coro e cun mente.-

In s'ultima dimora dende a mie
su gosu eternu d'un atera vida
cun su cunfortu de s'Onnipotente.

2° Poesia

A NOSTRA SEGNORA E SU REMEDIU

De ogn'anima trista e peccadora,
de su Remediu mama de amore,
ses Tue fidele intercessora
pro sullevare s'umanu dolore.-

Su fiore pius candidu ses Tue,
chi de puresa profumas sos Chelos,
vives felize bolas in tottue
subra sas alas puras ' e sos anghèlos.-

A Tie de su Remediu Segnora,
ricurrint sos pazientes derelittos
ca ses de sos infermos s'aurora.-

Pregant umiliados e cuntrittos,
e isettant dae Te grazias ancora
ca donas paghe e vida a sos afflittos.


T'adorat ogn'umana criatura,
ca de remediu fulgidu e benignu
ses Tue'eterna ' e divina figura.-

Cun su Cunsizu Comunale in testa,
su Populu de'Otieri sempre dignu
mustrat devota fide e faghet festa.

( MAGISTER)


3° Poesia

GOSOS a
NOSTRA SEGNORA DE SU REMEDIU

De su Remediu Segnora
ses Tue Virgine Santa,
in sa terra tottaganta
de grazias dispensadora.

1^
Dae Deus prediletta
ses sa nobile pianta,
de Remedios sa Santa
Maria Virgine netta,
ses sa femina perfetta
de sa vida s'aurora.-

De su Remediu Segnora
ses Tue Virgine Santa,
in sa terra tottaganta
de grazias dispensadora.

2^
Ses de'Deus criadore
intercessora felice,
Divina benefatrice
mama'e fiza' e Redentore
chi sanas dogni dolore
miracolosa ses tanta.-

In sa terra tottaganta
de grazia dispensadora,
de su Remediu Segnora
ses Tue Virgine santa.-

3^
Ses de Chelu s'istella
chi brillat dogni momentu,
ses delicadu ornamentu
fiza'e Deus pura e bella,
de caridade novella
dispensadora ti anta.-

Ses Tue Virgine Santa
de su Remediu Segnora,
de grazias dispensadora
in sa terra tottaganta.-

4^
Ses s ' aurora lughente
de ogni male pulida,
faghe ch'in s'atera vida
gose deo eternamente,
e i sa terrena gente
a Tie preghet ognora.

De su Remediu Segnora
ses Tue Virgine Santa,
in sa terra tottaganta
de grazias dispensadora.