«Saludu!, omine sabiu et donosu
Ischis chie so eo? Su suore,
De su samben cumpanzu e su dolore,
et de sa terra sale generosu.
Saludu!, sole bellu, dae s'aera
Tue mi ries serenu et giocundu;
Ischis chie so eo? De su mundu
S'onore pius mannu, cunsidèra.
Saludu a bois, preziosos, ch'istades
De sa muntagna in su coro inserrados.
Infustos dae me et carignados,
Cantigos de vittoria, cantades!
Saludu!, grandes, isplendidas naves;
Comente in unu mundu 'e fantasia,
Trasportades dolore et allegria,
Dae terra in terra, e omines, et aves.
Eo so su suore, già l'ischides,
Amigu ostru sinzeru et costante;
Naves bellas comente 'e diamante,
S'impronta mia onorada giughides.
Ardidas caras macchinas aladas,
De sos chelos reinas et signoras!
Sunt pro 'ois tramontos, auroras,
Ma no siedas animas dannadas ...
Saludu! No mi sezis connoschende?
Eo so su suore allegru et sanu!
Olade, olade, a su genere umanu,
Novas de paghe felizes portende.
Poderosos zigantes «grattacelos»,
Chi a sas nues alzades sa testa,
A su suore, aiòh!, faghide festa!
Pro me toccades superbos, sos chelos!
Et bois, trenos, lestros che saetta,
De me ite nde nades? Valentias ...
De istradas, de pontes, gallerias,
Non so forsis s'artefice et poeta?
Digas massizzas, cant'abba arrocades!
Cantu progressu a custa umanidade!
Chi eo bos so babbu, et bos so frade,
A sa notte, a sa die lu contades.
Oh! casteddos de liberos, inue,
Mentes profundas si turmentant tantu!
Cantu de me in issos bi hat, et cantu,
Pensadore fecundu, l'ischis tue!
Eo so su cumpanzu 'e s'agonia,
Pena et cuntentu de sa parturente
Et cando so versadu santamente
Una nobile so pregadoria».
Paghe, pane, cuncordia et amore ... ,
Ses su re de s'universu, o suore!