Sos sacros brunzos sun tottu sonende
s'annunziu de sa festa de Maria;
è die de giubiliu e allegria
pro chie à sa credenzia vivende.
AVE MATER REGINA, sun cantende,
in dogni altare in sa patria mia,
cantana innos de gloria tottue
ca Marna 'e Santas Grassias ses tue.
Maria invocada ses tottue
pro dare su remediu a sos males
si no fis tue, tottu sos mortales
tian perire sutta a dogni nue.
Disastros, gherra, peste e temporales,
chie los frenada si non fisti Tue?
Tue vida nos dasa forza e lughe
Pro supportare in sas penas sa rughe.
A Ottieri s'Isvizzera ibbia
la superat pro allevadores,
es marna puru de benefattores
amparu 'e povertade e orfania.
Poetas raros e improvvisadores
ch'ana onoradu sa terra natia:
sos donos de vertude e caridade
immortaladu hat sa nostra zittade.
Fi' don Franziscu Mannu Ottieresu
su promotore de su saldu eroismu.
Sende iffruttados dai su feudalismu
s'opera sua su fogu ada azzesu
fattei' movere Angioj su Bonesu
contra su prepotente vandalismu,
chi pro signale, in sa sua dimora,
sa furcas in sa gianna sunu ancora.