A BUSTIANU SATTA (Alas de sole)

Sos chiméricos pessos pintos d'oro
ch'in bida t'han alluttu s'esistènzia
cando
alas de sole, boladas,
intro 'e nues de trumentu
pro sòrbere
su mutricore brecu 'e sas ideas,
sun sa forza immortale
chi nos allattat s'anima.
Tue,
massaju de isperas d'amore,
has arau,
chin s'arbada 'e s'incanto,
sos pranos de su coro,
cupinde
nuscos de sardidade.
Cuddas caras cantones latte e mele
isparghen
in son innidos pittos de cust'Isula
paris chin cuddas lìricas d'attarju
suzzos de groria e parpitos de sinu.
Sas lassas ch'una die
t'han apertu sas jannas a su chelu
sun galu inoche, craras,
chei sa luche serena 'e sas istellas.
Cando su sole, lenu lenu lassat
cust'umile cussorja addolorfa,
s'intendet su murmuttu 'e sas funtanas
chi ti rasan devotas
«sos cantos de su sartu e de sa tanca».
Sun cuddas notas durches, delicadas
de sos tres res d'Arabia;
sun sa lampana arcana fatta 'e lacrimas
chi sorben unu babbu in su dolore
pro una prenda amada
chin tottu sos alentos de su coro.
E sun peri sos mortos de Buggerru
chi béntulan panderas d'arcu 'e chelu
ch'ispalattan sas chimas de sa terra
alluppadas de pfperas d'anneu.