Si mi cheres unu cantu
deo sigo a ti cantare;
ite cantu t’appo a dare
cando est tempus de piantu?

Cantare ti cheria
a su nessi po un’iscuta
a ti ponner bon’umore,
ma sun boghes de dolore
chi s’intenden subra e suta
de sa domighedda mia.

Isetia su ‘eranu
cun su cantu ‘e sos puzones
ch’annuntzian tempus bonu
ma s’intendet unu sonu
de bombas e de cannones
cun su cantu prus metzanu.

Isetia sos fiores
chi nde nuscan sas aeras
e imbellin d’ogni serra,
ma nd’est bennida sa gherra
a lassare calaveras,
non bido ateros colores.

Cando in cussos areniles
sos pitzinnos giogaian
fun sas abbas pius netas,
chentza odios ne minetas
cun amore s’abratzian,
como abratzan sos fusiles.

Custas mancias, custos neos
imbrutan s’era noale
de chie si cheret mere,
cando chilcat su podere
una conca chentza sale
b’atit semper tempos feos.

Mastighende su tenaghe
fino goi sa cantone
chi nd’istudat sa lumera,
ma b’est semper un’ispera
chi nde torrat sa riscione
in camineras de paghe