Oi est meda su bantu chi mi donas
ca tui mi coronas che poeta,
ma, seu analfabeta deu puru;
seguru s’Elicona si nd’erridi
m’a mimi torrat sidi cantu a bosu;
chene timi dda cosu a spagu e seda.

Su bantu chi mi donas oi est meda
ca tui che poeta mi coronas,
oi est meda su bantu chi mi donas
ca tui mi coronas che poeta;
ma, seu deu puru, analfabeta
si nd’errìt s’Elicona de seguru,
ma seu analfabeta deu puru
seguru s’Elicona si nd’erridi,
m,a mimi cantu a bosu torrat sidi
chene timi a ispagu e seda cosu,
m’a mimi torrat sidi cantu a bosu
cosu a seda e ispagu chene timi,
ma cantu a bosu torrat sidi a mimi
e chene timi cosu a seda, ispagu.

Ddu tiru a istentu cuddu tragu
amiga bella ’e sa dign’Elicona.

Ma deu non dda bollu sa corona
e ne mancu sa trona po iscannu,
ca non seu su mannu ’e su Parnasu
ca mancu arrasu ddu fatzu s’imbudu;
agiudu, amigu caru, ti domandu
e mandu po s’imparu prell’a Apollu.

Ma deu sa corona non dda bollu
e po iscannu ne mancu sa trona,
ma deu non dda bollu sa corona
e ne mancu sa trona po iscannu;
ca non seu de su Parnasu mannu
s’imbudu non ddu fatzu manc’arrasu,
ca non seu su mannu ’e su Parnasu
ne mancu arrasu ddu fatzu s’imbudu,
amigu caru ti domandu agiudu
e po s’imparu prell’a Apollu mandu,
amigu caru agiudu ti domandu
e prell’a Apollu mandu po s’imparu,
agiudu ti domandu amigu caru
e mandu po s’impar’a Apollu prella.

Ddu tiru a istentu cuddu tragu
de sa dign’Elicona amiga bella.

Amigu tui tenis sa favella
i a sentinella ses in su giardinu
chi curas a puntinu e cun amori
ca ses cultori de sa poesia;
cun s’armonia prenis dogna coru,
in oru tenis una spiga ’e trigu.

Dda tenis sa favella tui amigu
in su giardinu ses a sentinella,
dda tenis tui amigu sa favella
e ses a sentinella in su giardinu,
chi curas cun amori e a puntinu
ca de sa poesia ses cultori,
chi curas a puntinu e cun amori
ca ses cultori de sa poesia,
e prenis dogna coru ’e armonia
ca una spiga ’e trigu in oru tenis,
cun armonia dogna coru prenis
ca tenis una spiga ’e trigu in oru,
cun armonia prenis dogna coru
in oru tenis de trig’una spiga.

Ddu tiru a istentu cuddu tragu
de sa dign’Elicona bell’amiga.

Po cussu non ti dongu crocoriga
ca mai de sa riga ses bessiu;
cumpriu ses amigu Claudinu
ca su destinu t’at fatu poeta,
e sa praneta tenis de Talia
sa ’ia prenis, si sonas, de lussu.

Crocoriga non ti dongu po cussu
ca mai ses bessiu de sa riga,
po cussu non ti dongu crocoriga
ca mai de sa riga ses bessiu;
amigu Claudinu ses cumpriu
ca t’at fatu poeta su destinu,
cumpriu ses amigu Claudinu
ca su destinu t’at fatu poeta;
e de Talia tenis sa praneta
sa bia ‘e lussu si sonas dda prenis,
e de Talia sa praneta tenis
de lussu si sonas prenis sa bia,
ca sa praneta tenis de Talia
prenis sa bia ’e lussu candu sonas.
Ma tui che poeta mi coronas
ca est meda su bantu chi mi donas.