I' sa boche chi isterret arta e lenta
pianghet sa zente mea mizas d'annos
e paret chi li mancat a urdos s'alenu
pro custa boche troppu tirada.
Su basciu paret essiu dae gruttas de mare
o da undas pilisadas dae su bentu
sa contra gurda marcat su tempus de su dolu
e los superat sa mesu-oghe jubilande
lamentu 'e zente disisperada
o boche de chie l'at piccau su bentu.
Poi creschet sa boche e la piccat su tempus
i' su pas ·su 'e su ballu
e sas paragulas si curren e s'ammiscian;
basciu e contra sun cursa chene modu
e sa mesu-boche est sa bellesa
de chie dassat andare su cabaddu
a cantu cheret andare
in campu in foresta in monte
contr'a isteddos liberos
a su mare irbarriolau
e no at paragulas ne gestos
ne manera de la mantenner
custa maschera 'e bentu
si no sa boche liberada
chi si pesat i' s'aghera.