Adiosu Porto' a menzus biere.
Si est beru chi b'est su Deus Bonu
e chi tottu non morimus chi' su corpus
ma nos abbarrat unu restu 'e sentidu.
Non pesso de mi trattenner meda.
Solu chi m'irbrighe custas cosicheddas
nessi a nde bier sos izos sistemaos
e a mi piccare unu pacu 'e sole i' sa bezzesa
e benzo a chistionare chin tecus, si non prima
de sa pizzinnia tua e mea e de comente
nos pariat bella e sicura.
Sos contos de sos mannos addenotte
cand'imus galu in bidda e poi in campagna,
tottu pagura e bijones de ricchesa de pache
de tancas grassas e de una familia onesta.
Ricchesa no nd'amus bidu, e sa familia
manna, chi amus appiu, est unu corgiu 'e nuche
i' su mare.pilisau dae su bentu;
e oje su m'lnore tuo, pianghet pro tene,
chi non b'abbastat su coro a lu badiare
ca d'at dau semper gherra sa bida
e pius gherra d'est costau a morrer
e non t'est serbia s'onestade.
Semus sos operajos de sa bida.
Cando cheret nos assumet o licenziat
o nos mandat in cassa integrazione
e non pro abilidade o balentìa
ma pro fortuna zeca o simpatia.
No iscio cando m'at a giubilare
si mi tenet in presse, o si mi dassat
a mi godire su sole e sos nepodes
e su reposu de una bida tribagliada,
in d'unu cantu 'e ortu, car'a sole;
e no iscio chi est c'at pius fortuna
de nois duos Porto'
si bi ses galu
o ses cussos ossos in cussas battos taulas
e si est menzus a b'esser o a non b'esser. ..
ma si b'est su Deus Bonu,
adiosu Porto'! A menzus biere!