Como, semus inoghe, in su tretu
angustu 'e unu mundu istranzu,
'ue sos omines nos abbaidan
cun ojos chi fachen ispantu.
Semus inoghe, sutta unu chelu
chena sole e chen'isteddos;
su die nos paret già notte,
sa notte, pius niedda 'e su peccadu.
Semus inoghe, chircande 'e asciutare
sas lambrigas, pustis de àer bijdu
in sas funtanas ranzigas de sa malaura.
E bois, funtanas beras, funtanas bias,
in sas soledades de cuss'isula incantada,
bois, isettades custas buccas sididas,
custas laras brusciadas.
Chissà, s'amus a torrare
a sas funtanas nostras?
Chissà s'amus a torrare
a ùe sun' sas raighinas
de su sambene nostru?
Solu in cussas funtanas
poten agatare alenu sos sensos nostros;
solu cussas funtanas poten samunare
sas piaes de s'anima nostra.
Tue puru, Terra istregada nos isettas,
pro 'estire 'e gala
sas dies tuas, sos beranos tuos.
Chissà, s'amus a torrare! Forzis,
amus a torrare cun sas manos boidas,
cun s'ischina unchinada da-e su tempus;
forzis, amus agatare
sas jannas tancadas, sos foghiles studados.
Eppuru, cherimus torrare; esseret solu
pro t'intregare custas carenas,
ultim'ispera, ultim'imposta,
pustis de una vida tribulada,
chena cunfortu, chena ausentu.