So solu cun su sero ...
Cun sas carres brujende,
'estidu de piore e olasina:
oe totta sa die app'arzoladu.
«Correddu» e «Malutrastis»
a su carignu 'e su puntorzu meu
rispondian a calches
chena brios.
Si recuit su sero,
e setzidu m'agato
subra sa pedra muda 'e s'arzola,
inue si setziat mannu meu
isettende su 'entu.
Unu grillu sa luna
giamat e caritunda
paret isperiare
a su campusanteddu,
ue dormit pro sempre Babbu-Canu.
«Babbu-Canu istimadu,
mandamilu su 'entu ... »
«No, nebodeddu meu,
istanotte su 'entu
ch'est ninnende su mare».
Coment'est tunda e candida sa luna!
Mi paret un'arzola
de mannujos de prata ...
lstademi un'iscala a bi pigare!