Acchi sigu a pienà chisthu pabiru
d'iscranfioni chi ciammani puisia
e m'escini cument'e lu rippiru
candu m'affoga la marincunia.
Acchi è chi sigu a raccuntà a lu ventu
chi mi pesdhu abbaiddendimi la luna
e l'occi mi s'unfieggiani di pientu
si a un pobaru li fuggi la fusthuna.
Parini isthori invintaddi pa nienti
e fòri chi no sò di chisthu mondu;
parauri e bastha isciddi da la menti,
puppii d'isthrazza fendi un baddu tondu.
La bozzi è, inveci, di la me' tristhura
chi no mi nasci da la fantasia;
l'ippicciu nudu di chidda paura
chi m'ha furaddu tutta l'alligria.
Cussi mi frazzu tutta chistha vidda
senz'abé cunnisciddu pizzinnia
e m'ha invicciaddu la vana isthimpidda
di pissighi pai fozza una mania;
e minn'isthoggu cu li mani bioddi
e un sacchettu di sogni sempr'affaccu,
féndimi di chi soggu cori moddi
pa no dimmi chi soggu un poggu maccu.
Parò si chisthu soru è lu macchini,
tuttu lu mondu pienu ni vuria
da inoghi finzament'a la so fini:
un macchini chi ciammani puisia.