In custos fenos siccos,
caddos malos de fogu,
curren su palu a fiancu 'e pare.
E i sos chercos chi sempre m'han dadu
pro sas erveghes mias lande e sida,
sun telarzos de fumu e de fiamas
chi faghen de su sole
una luna aumbrada a mesudie.
Caras erveghes mias,
curride fin'a bidda
e peri sas garreras giuilade
e omines e pedras
pro pesare unu muru altu altu
chi a pes suos,
cust'allutt'uraganu,
frundat tristu sos sonnios, marranu.
E bois, «Caribruttu» e «Traitore»,
trazadechelu a paschere,
chena 'asare terra,
abba in fondu 'e mare.
E si m'idides ruttu
subra custos lentolos de chijina,
linghidemi sas manos,
linghidemi sa cara,
forte in ambas orijas m'appeddade.
E i sa majarza 'ezza,
si 'enzerat,
a fele cumbidade.