Inghiriadu da oghes festantes
de pagos pizzinneddos seberados
dae sos cumitados
fattos apposta po s'occasione
s'Imbiadu in persone
est bennidu fra nois emigrantes.
E s'agattat cuntentu, narad issu,
ca sa sorte !'a fattu messazeri
in logu foristeri,
a nd'attire unu pagu e isperansia.
Rimbomban in s'istansia
sas promissas, c'an atteros promissu.
- Sa Patria, bos tenet in su coro
ca sezis sos dilettos fizos suos -
tando, si pesan duos, .
duos ibbia, a zoccadas de manu,
faghen pagu baccanu .. .
Biado' a issos, e su creere insoro.
Sighit assaborende su zigarro
isfozzat su paperi preparadu
c'atteros l'ana dadu,
e si sentid fiero, ma sa zente
posta in cuss'ambiente
burdellat, malaittu su catarro!
Intantu, si che colat sa serada,
cun su mattessi tonu, sempre cussu,
si pinnigat su brossu:
- Est ora e nos lassare, m'addoloro ...
Bo che juto in su coro,
sa missione mia est terminada.