Unu muru 'e carvone
in dainnanti paradu,
tetteru e a broncone,
nieddu che' peccadu.
Zeo, nieddu, arrajoladu,
contr'a issu che' demone,
lu chimento e a unu ladu
che lu ponzo a muntone.
De rocca una muntagna,
in conca una minetta,
gai ostile e istragna
chi pore già ti etta';
crastos pro fagher petta
cun carre tua bagna:
attentu chi t'isetta'
malinnu che' magagna.
De macchinas chimentu
e lughe tremulante;
bruere puzzolentu
e fantasma anelante
in s'inferru brugiante
larva in azitamentu,
cun sa morte in bagante
chi sighidi a s'abbentu.
E a su pista pista,
fatto sa zorronada.
Sa fadiga mi ch'ista'
in palas incarnada.
Cand'esso, impampinada
da' su sole est sa vista:
l'aìa ismentigada
chi cussa lughe esista'.
Tussiende che' beccu,
carvone craschiende,
- Chi ti nd'essa' s'istreccu! -
tristu maleighende.
Suoradu, pudende
e s'istogomo seccu,
sos ojos lagrimende
che' bestia cun peccu.
Appoi, bene pulidu
e bene samunadu,
mi che soe bessidu
de males liberadu.
Mi c'appo ismentigadu
cussu logu ischividu.
Pensende soe torradu
a su nadiu lidu.
Ite bellu manzanu!
Poeticu orizzonte!
Su sole 'e su eranu
nd'ispunta' da' su monte.
Est a mie de fronte
su paese nostranu:
de bellesa una fonte,
gosu de cristianu.
Mih, s'aria genuina
dulze e chena rigore;
mih, s'abba cristallina
de su riu minore;
mih, s'eternu pastore
cun sa robba erveghina;
mih, su monte mazzore
cun foresta azzurrina;
mih, sos campos de trigu
ei sas birdes iscras,
su sole che' isprigu
ei sas binzas friscas,
ua, figumuriscas,
prona, pessighe e figu.
Male già no t'arriscas:
tott'igue est amigu.
Sas cheddas pasculende,
fiores a muntones;
sos massajos cantende
umpare a sos puzzones;
festas e fogarones
petta frisca arrustende;
feminas in braccones
riende e trebeddende.
Su inu zenerosu
iscurred a trainos:
ite ispantu, ite gosu
in tottu sos caminos!
Ma proite, mischinos
emigrantes, a su ermosu
iddizzolu e bighinos
azzis nadu adiosu?
Chirchende sa fortuna,
azzis zumpadu mare.
Contende a una a una
sas chidas pro torrare.
Sos annos den passare
ma de die manc'una,
passa' chena pensare
a s'Ichnusa bruna.