Zerrius, prant' 'e pipius,
prantu de mammas, mulleris, de isposas.
Muccadoreddus che bander'a bentu:
sa navi de sa speranza è partendi
carrigh' 'e genti ch'ha' lassau agoa
in affettus prus carus;
de genti ch'est arroscia
de abettai cuddu nasci a nou promittiu;
de genti ch'ha' gherrau
in d'una farrancar' 'e terra sciutta
(fogus, annadas malas, depidus senz' 'e contu);
gent'arroscia di ess'a manus a gruxi
senza de sciri mancu issa poita.
Sa navi de sa speranza è partendi
carignada de su Golfo de is Angelus,
de is costas ispolladas
de pasturas e armentus;
carignada de cust'Isola bella,
de cust'Isul'antiga, sfortunada
trista, pren' 'e annuggiori,
aundi scetti su soli scid arriri.
- Baxi! Sa bona sorti s'accumpangid
andendi 'n terra strangia
po 'nu sacru derettu!
- Baxi! Ch'è mellus meda
de ponn origa a dottrinas malignas
de profetas sidius
de discordias, de sanguni!
- Baxi! Po panni perd'asub' 'e perda,
francu asub' 'e su francu,
po ndi torrai a domu
nostra totu su beni
chi nei bòganta cuddus corus malus!
Sa navi de sa speranza è partia
po 'na missioni pren' 'e nobilesa.
- Baxi, fradis mius! Baxi
a logus chi no depestis andai,
po 'nu mussiu de pani.