Semus torra deo e tue,
che sun tottu sas olias,
e che tando, ancora, in cue
sa domitta, sa crisura:
in coro, un'intessidura
de sonnos e poesias.
Mih, sa 'idda, mih, su mare,
mih, sas barcas. Nois puru
'essiamus a piscare
isteddos, risos, colores,
milli 'asos de fiores,
sos carignos de s'iscuru.
Mih, sa luna. Acchè su chelu
cun su mare addae addae
chi si 'asan! Unu velu
ruku los unit. Profonda
s'intendet sa 'oghe 'e s'unda,
sa mantessi a torra e bae.
Mih, sa lughe chi si azzendet!
Tottu est che una 'ia.
Isculta, isculta. S'intendet
de campanas sa sonada.
Bides? Ti ses sinnada
che a tando! «Ave Maria».
Aisetta. Mih, su 'olu
de sos ultimos puzones!
Sezzi chi su rusignolu
forsis cantat ... l'hapo nadu?
Millu, iscultalu, est torradu
cun sas solitas cantones.
Intende, ancora, 'e su 'entu
tottu sas arrejonadas!
Mih, su cuntrastu 'e s'arghentu
de sa luna in abba e terra ...
s'uppa addae 'e s'alta serra.
Intè su passu 'e sas fadas.
Tottu est che tando Maria!
Incantu, palpidos, risos.
Totta s'antiga majia
nos ligat senza cannau:
finzas s'in coro s'astrau
hat fattu morrer sos risos.
Aisetta. Accantu, accantu
che a tando mi camina.
Lassa piantu a piantu
chi si miscen: tantu isfogu
torrat azzender su fogu
chi fit sutta sa chijina.
Damunos torra sa manu.
T antos annos sun passados,
corno, calchi pilu canu
hat in zuffos fioridu
ma no est tardu pro haer bidu
chi nos fimus isbagliados.