T'amus pregadu, t'amus aispettadu,
Frade nostru carraie de dolore.
Ogni manzanu, a prima lugh' 'e die,
candho s'asciat a bolu sa calandra
barattasgiola de cantones bellas
pro unu olu, nois amus bramadu
fozas de pramma e rattos de olìa,
e balcones cobertos de fiores,
e piseddhos currendhe a profiscione,
e osgios bezzos lùghidos de piantu
sutta sos muros de sos terighinos.
Cantas lunas si sunu cunsumidas,
cantos beranos, cantas gioventuras,
cantos brazzos de rughes, aispettendhe
su manzanu promissu ... E-i sos campos
hana dadu fiores chena ranu
e sunt restados mudos, chena oghes
si no boghes de àes; e-i su sole
hat creschidu fiores de tristura
sura ogni pedriscia 'e balcone,
die pro die, làgrima pro làgrima:
ammentos de partidos, de fuidos
e de piantos: bramosias de fozas
boladas a sos bentos de s'atùnzu.
No amus mai sessadu 'e t'aispettare.
Beni! sa zente hat osgios chena fundhu.
Custa zente famida, custa zente
sidida, custa zente abbandonada,
custa zente piena 'e disisperu,
hat bisonzu 'e nottes chena canes,
hat bisonzu 'e dies de suòre,
hat bisonzu 'e manzanos de calandra,
hat bisonzu 'e paghe. Frade, beni!