Saludu, Bustià! Saludu
a sa piatta monumentu!
In custu die de ammentos
t'ispettaimus, Bustià, a s'inchinadorzu,
cando chenan sos pastores
sutta sa luna
o intro su pinnettu
a lughe e fogu mori-mori,
mossende a bolta a bolta
pane accabiddadu e casu siccu.
Cantos semus in custa piatta!
Ch'est Costantinu, brusiende sa passione
subra granitos
tostos cantu sa volontade ostra.
E tantos atteros amigos semus inoghe,
unidos dae sa poesia tua.
Insumma, Bustià,
su coro 'e sos sardos est inoghe!
In custu sero 'e festa,
ogni tantu iscultende
su movitiu de alas
de s'ispiridu tou
chi s'intendet in aria olende.
E tottu idimus s'ogiada dulche,
s'amabile risu tou
sutta sos mustazzos a ranzolu.
Zentàriu a isticcu est inoghe!
in sa piatta tua, Bustià,
pro Ti faghere onore,
nobilissimu frade,
iscumparsu isettende s'aurora.
Permitti, Bustià:
Ti cherzo faeddare in segretesa
de sa repula mala
e de Sardigna desolada,
chi hat timore 'e fìzos suos,
cuddos chi no s'ammentan
sa marna e su mortu.
Sos atteros viven de terrore,
ispaventados dae palittas rujas
e omines cuguttados.
Tottu podimus timire frades nostros,
tottu podimus ponnere in rughe
frades nostros,
incorazzados dae limbas ligadas
e lezes noas giai mugoradas.
In sa piatta tua, Bustià,
si ballat e si cantat,
ma chie, in libertade,
podet torrare a domo?
Sa libertade est fora 'e idda tua,
a cuddala 'e mare, a cuddala 'e montes·
ligada a meres usureris '
e . a peleas malas,
a cudreles ammentos.
Una vida impossibile
de azzurrida gioventura
chi si cheret diversa
de comente est restada.
Sos atteros semus inoghe

mossighendenos pari pari
e crabistados dae revudu umanu
che a sempre, in Sardigna disterradu.
Gai, appeigados, a ischina truncada,
isettamus s'aurora!
Ma cando, ma cando
si pesat s'aurora?
Ma cando, narami Bustià,
subra sas roccas rujas de irgonza,
si pesat s'aurora?