In dunu lett'e pena
abettu, cun sa luxi,
s'accabbu de sa notti
chi mi ponid'in gruxi.
Non di cumprendu s'ora:
sa luna est'arta ancora.
Depid'essi lugori
cun su xelu steddau.
Ascurtu a origa posta.
Unu timidu cantu
azzarda su caboni
sene tenni risposta.
È cittiu su molenti;
non s'intendid'ancora
corrinendu in padenti.
Pregu Nostra Signora
e abettu in su scuriu
chi assumancu si mova
su pilloni in su niu.
Po chi torri sa luxi
e pozza ponni fini
a cust'eterna notti
chi mi ponid'in gruxi.