In custa festa 'e cabidanni,
bendijolu 'e lagrimas
manigo nodos de piantu .
Lughidas iscarpas
gighent a passizu
coros fascados de ruinzu
e miradas d'astrau.
Signore 'e sos bentos
raidos de trigu maduru,
faghe sos coros
raidos d'amore de frades!
Signore 'e su mese 'e austu
chin sos pilos alluttos de fogu,
faghe sos coros altares azzesos
d'amore chi brujat!
Signore ch'has tintu 'e oro
custa festa 'e cabidanni,
dona risittos de prata
a sos ojos de astrau
chi mi passan su coro
che ispidos frittos, punzirudos.
Signore!
Signore!
Signore!