Si sunt cagliadas sas attittadoras...
Una candhela 'e chera fumigosa
umbras nieddhas est movendhe e longas
sura sos muros pienos de dolore.
Sura su lettu, biancu che-i su nìe
unu paret drommendhe, ma una 'rosa
ruja l'abberit totta sa pettorra.
Gighet sas manos giuntas, attaccadas
a una corona chena cominzada
e-i sos ojos abbertos'
parene duos gridos de terrore.
Chena reposu, da-i capitta 'e lettu
un umbra est tuncendhe, e-i cussu tunciu
paret chi siat bessendhe da-i sos muros
pendhendhe da-i sas tràes, coppeddhendhe
a balcones e giannas sizilladas.
Sa carrela est piena 'e zente muda...
E accò unu toccu 'e campana:
s1 pesat s'umbra e paret piùs manna
cun sos brazzos abbertos, oruléndhe:
«perdonu, Deus, perdonu, si est mortu
disisperadu, chena unu carignu,
chena unu asu, chena beneiscione:
mi l'hana mortu fattu su masone!».
Ojos istraccos, sutta sa berritta
lassan fuire lagrimas de fogu... '
«Pro sos vint'annos suos, Deus meu,
pro sa morte chi hat fattu in abbandonu,
pro s'ultimu momentu 'e disisperu,
beneìghelu Tue e dàli paghe!».
Como s'istanzia s'est piena 'e lughe
e da-i sa jann'abberta intrat sa rughe:
si lampat cussa marna istraziada
a pes de su preideru preghendhe
«Babài meu, nadebìlu 'ois
a Deus si non hat immentigadu,
si sos omines nostros
devene morrere tottu 'e morte mala;
nadebìlu ch'in custa iddha mia
no' sonat mai campana
chi no' siat campan' 'e agonìa.».