Lu veggu chi sei pronta; aggiu misciadu
lu megliu trigu in mezzu a tanti ròsi
iffugliadi pà te: chista è l'usanzia.
Ma nò possu ippricà chi m'è manchendt
lu cori. E abìa di ditti tanti còsi!
Oggi nò è dì di pientu, è dì di festha;
mi pari di su'nnià... ma cantu set
bedda visthuda a iposa! E abà ti n'andi
e mi manca la luzi all'occi mei.
Nò debu d'attristhammi di cussì,
pònidi isdhunicciada, azza lu veru
chi t'abbaiddia e zercha di ridì.
Ti lampu chisthu trigu e pregu a Deiu.
chi ti dogghia forthuna e Dem la fozzia!
Chi tu sia binidetta, cori meiu,
ora e sempri pà tutta l'alligria
chi m'hai dadu da candu ti purthaba
i l'intragni, pà tutti li gutteggi
di latti chi, ridendi, m'hai suggidu,
pà canti passi hai posthu in casa meia;
sia binidetta e binidetta sia
pà li mossi di pani ch'hai inguddidu.
Pà dugn'ora e minutu aggi la santa
binidizioni e dugna bona sorthi
e Deiu la fozzia! Tu sei lu me' fiori
e ti sò disthacchendi da la pianta.
Vai cun sarudu, lassa a me l'affanni,
vibi cuntenta in pazi e cun amori
umpari a tò maridu, pà zent'anni.