E corno Deus de chelu
a chie canto
cust'urtima cantone cana?
A bentanas apertas
a su tempus nobu promissu,
a Sardigna
barandilla de mares e de chelos?
Su bentu ghettat boches!
Como m'ammento:
unu frore ruiu,
una melagranada aperta,
una tempesta 'e luche
cussa lapìa 'e ramene luchente!
Fippo operaiu 'e luche soliana
corno so oscuru artisanu de versos,
currende un'odissea 'e rimas nobas
chi mi torret su sonu 'e sas lapìas:'
ramenosas campanas
brundas timballas e concas
e sartaghines grecanas.
Cada corfu 'e marteddu
allughia unu sole,
e su drinnire
d'una musica 'e framas
m'ingravidabat su coro,
e mi prenabat sos ocros
d'unu mar'e isteddos.
Frailarju 'e cantones friscas
camino a tempus de luche
pudande sos mezus frores,
in custa paca die chi m'abbarrat,
pront'a intrare
in su nurache 'e s'umbra.
Gai forzis su sole
in custa die de chelu
est benniu a cojubare
frores de neulache
chin fruttos de melalidone.