Ti miro ancora e ancora sas venas
han palpidos pro te, pius sentidos
forsis, ca penso, idendedi, a fuidos
pensamentos d'amore, de un amore
fattu de risos bellos, de dolore,
de ojadas furanzulas e penas.
Nascheit improv\risu, crè non crè,
tra zoccos de marteddos e frusciare
de pianas, cand'enias a chilcare
asciuza pro azzendere su fogu;
totta brios, moinas, totta giogu;
e-i sa pius bella fit pro te.
Non meda sos faeddos, bastaian
sos risos bellos de sa gioventura.
Tando sa vida fit totta lugura:
unu 'eranu de gioias ebbia,
e una serenada 'e simpatia
su coro cun sos ojos cantaian.
Poi una die mi ses isparida.
E sun passados, sos annos. Passados ... !
Tenimus, oe, fizos istimados,
unu diversu amore tott'e duos:
Eo sos mios e tue sos tuos
affettos e fastizos de sa vida.
Perdidos sunu colores e brios,
su tempus nos hat ambos cambiadu.

Oe solu, s'ammentu 'e su passadu,
nos ligat e nos unit un istante.
Però, de tando, tottu ch'est distante:
sos risos tuos e sos inghirios mios.
Bae in bonora, bae e torra ancora,
s'asciuza pius bella est sempre a tie:
Como che una sorre ses a mie:
pius bella mi pares, pius cara.
Has in sos ojos una lughe rara
pius pura de tando, incantadora.