Totta die messende istat comare
a fìancu a fìancu a su maridu.
Sos ranos d'oro chi solet messare
han'a fagher su pane saboridu
Cantas e cantas, cun tintas in laras,
passan s'istare insoro a gioga e rie
e malas critichende a cale a chie
istan boghende a campu anzenas taras;
o chirchend'istan, cun pannias raras,
su modu 'e si 'estire 'e s'ispozare,
in sas altas montagnas, in su mare,
tra festinos, d'incantu e ciasconella;
invece umile tantu, e tantu bella,
totta die messende istat comare.
Su sole tantu mi l'hat fatta mora
ma li deghet a cara, ed est grasciosa;
paret de brunzu e tenet calchi cosa
chi cun incantu dat rispettu ancora;
che una deidade messadora
ch'happat sa terra allevadu e nutridu.
Sas ispigas sos didos l'han fìnidu,
eppuru est totta briu e bonumore;
non timet sole, non timet suore
a fìancu a fìancu a su maridu.
De sos astros su sero a su lugore,
cand'una lenta frina leat bolu;
cando s'intenden de su rusignolusos lamentosos pibios d'amore
tando comare pregat su Signore
pregat pro tottu ca ischit amare,
e paret li rispondat s'istrisciare
de sas ispigas reas a su 'entu:
«Cresche a comare, cresch'a chent'a chentu
sos ranos d'oro chi solet messare».
In sos seros de ierru a fogu azzesu
comare sos fizitos hat in giru.
Ninnat su minoreddu e unu suspiru
tenet pro su maridu tantu attesu,
a semenare, in su campu trattesu:
colzu, si bastat est affritturidu!
Como chi ogni fizu si est dormidu
si po net suspirende a sedattare;
bi solet duas lagrimas misciare
han'a fagher su pane saboridu!