PRATOBELLO
Chimbantannos a oe
su populu airadu
firmat s’invasione militare,
in su sessantanoe
s’istadu at ordinadu
s’0rgolesu devian ocupare.
Cun faghes sapiente
pesada tottu paris s’est sa zente.
Tottu su populadu
cumpattos e unidos
resesin a frimare s’invasore,
Fieros an lottadu
che eroes ardidos
tottu sos Orgolesos cun onore,
diffesu an cun rejone
sos fertiles terrinos de cumone.
Sena esser armados
in modu corazzosu
lottan e binchen contr’a sos trasseris,
abiles sun istados

cun su coro bramosu
che sos Sardos pellitos gherrieris
abiles e balentes
firmos in cuss’idea, coerentes.
Apustis amos bidu
in Perdas in Foghesu
e in sa Madalena su ch’an fatu,
sos males ch’an batidu
su foghu ch’an ’inchesu
no s’istudat est unu disacatu,
tristuras e’ dolores
an semenadu mortes e tumòres.
Pro cussu su valore
de sa lotta Orgolesa
che esempiu cheret amentadu
pro chi sos benidore (s)
bramen cun fieresa
e iscan su proite s’est lotadu
chi sos Supramontinos
fieros ant difesu sos terrinos.