PAGNAS “SOLEDADES” …

Bidros ancora airados
bardian' cristas de muros;
a pibiu, de cancaros su tirriu
banzigat ghjannas e bentanas
in podere ‘e su entu
a ojos a carrera irbarritzadas.
... B'at isalenu a rantulu no bidu
perd’impedrados
a ‘eramine mudados!
…e nuscu leas solu de mudines
in pagnas “soledades”…
Eppuru .. o fini “movidas de alas”
iscaganos, tinnidas de fraile
de carrulu sos tronos
in sos atterighinos,
o patitas a trottulu in bessida;
zente... affainada
ma puru ‘e “acciappafua, “sas voghes”;
e cuncordu 'e intrinadas
a istraccas recuidas “bullittadas”;

e gasi pro zenias e zenias ...
in d'una “bidda”
pesada in raighinas de connottu
fattende vida, finza a la “cumprire”;
e “testimonzu” dende a “benidores”
tenzende ‘iu su “logu”
cun su toccheddu sou eternale;
…ma como arresu
a sa “modernidade”!
Su chi pariat “mai”
nd’est bennidu ghjà como a iscabulare;
.. restat isterzu boidu post’a banda!
calighe ‘e muru brottat in cabones
e che tendina “a muda”
su “chelu” che li tessin sos ranzolos
subra ‘e sos frantos bidros de bentanas
... mah
... b’hat portittas faladas !?!
sogh’est ingalenadu in sonnischida…