EST FESTA MANNA

Chin sos colores de sa pizzinnia
e chin sa luche 'e s' anima, cuntentu ,
cherjo pintare lizos de coraddu,
arcos de chelu, nidos de cossolu,
e tottu sos isteddos;
cando, sa luna bella, cari-tunda ,
accasazat d'amore s'universu.
Cherjo pintare , cherjo ...
dare a su mundu intregu
sos alentos prus craros de sa bida.
Cando su sole naschit su manzanu,
tra pìlios e lusingas,
chin sas notas festosas
ch'isparghen de candore
prados, padentes, ribos e campuras,
dia cherrer cantare a boche isparta,
chin su coro a toccheddu,
sas pèrelas chi surcan de bontade
su risittu immortale, delicau,
de sa Marna divina, immaculada,
chi nos dat luche, forza e galanìa.
Cando, in tribulas, messo su labore,
chi mi drinnit d'amore cada impreu,
àrzio a su mundu custa tassa 'e binu,
craru che-i sa bellesa 'e s'universu,
pro chi tottus, alligros, bivan sèmpere,
in s'abbrazzu serenu 'e su trabballu.
In capidanne, cando,
sos iscolanos, tottus,
preparan bùssias, pinnas e tinteris
pro andare a sos bancos de s'iscola,
sos massajos arrodan sos adressos
pro facher sa binnenna. Est festa manna!
Sas pizzinnas aperin
sas jannas de su coro ...
Sos zovaneddos bolan
meravizas d'incantu.
E-i sas mamas isperan
chi lis ridat galana sa fortuna ...
chin nd'un'intrada noba.