CULTURA DE PADENTE ... E DE TZITTADE

Pastores de oje
ponent fatua sa gama
cun passu anticu.
Boes e caddos
e molentes
ant cambiadu
cun berturas e tratores.
In s'intragna 'e s'anima
bardant galu corno
sa leze 'e su padente.
Berturas e tratores
e lampos de rajos
sunt trastos de cultura istranza.
Poetas nobos
cantant amore e pache
preicande un'ateru banzeliu
chi non s'aperit aghidu
in coros de crastos
in ulicras surdas
in tancas de odiu
in bidditzolos de rancore
inserrados.
Inzenios nobos
non cambiant
mentalidade antica
a chie
at pro iscola su tzilleri.
Libros de sientzia
non paschent
in tancas de animas cunfinadas
in pastura desertas
in passibales de ismenticu.
Omines de pinna nobos
non brinchiant cresura
e muros
de cussorjas serradas
in fozos de papiru iscrttu.
Iscrivent
e s'iscritura issoro
est petzi disaogu
de dissipulos e collegas.
E mantenent fora
pastores e massajos
chi non cumprendent tzafu
de su cantare issoro.
Sichit su pastore
sa cantilena
de s'andalibeni
dae bidda a campu
presoneri de cultura
istasìa
in seculos de istoria.
In s'ampraria de su chelu
unu matessi sole
luchet a duos mundos
chi non si jobiant galu.