BORTAEDIE DE ANNEU

Aranzolos de mudore
son imbolicanne
gromeros de solidades
peri gutturinos attristados
e carreras allampiadas
pro m'intèssere
talaranos de annèu
supra parthas atturdidas
in custa bidda irmenticada.
S'ispricat
supra muros carchinados
a gromos de soles
su disisperu meu
illacanadu.
Est morte
custa bida mea
pizzinna
chen'isettos:
morte
d'erbech'istasìda
corfad'a gaddighinzu
chi prus non murghet latte .
E d'un'improntu
a thunzos pasàdos
càmpanas feridas
m'allagan su coro
de angustìa.