SA VIDA

Eo sò cumbintu chi a mortu
est che a non b'esser naschìu.
Pesso chi no nos arreat pius nudda
ne piachere ne pena
ne disizos ne ammentos
ne amore o dolore o fastizu
e chi no est malu ne bonu.
Pezzi pessande a tive mi dòlet
custu nudda chi m'immagino
a mi vier a pustis mortu .
Ca tue ses mura suzzosa
granada isperrada
ses lanedda intuppìa
cuvada in sa rocca
ses frisca e bullìzas
su sambene in benas .
E ses lacu chiètu
chin friscuras e umbras
e pischìnas de luche
uve s'anima pàsat
Ses unu mundu mai bòdiu mai cenu
mai vidu tottu, mai tottu connottu
chi m'abbìvat e selènat .
Cando at a passare custu mundu intregu
app'a esser che a prima una cosa
vritta e morta chi nò sento e de sa cales
nò m'importat chi finat.