SUBRA SU PONTE

Pesantes sas nues a prumu estidas
lassan su coro tristu, in isconsolu,
a pranghere cun lagrtmas buddidas
chie in su dolore isettat solu
de tantu iscurigore un'iscrarida .
Subra su ponte, s'anima inchieta,
abbaidende s'isprigu 'e sa vida:
paret morrer su coro 'e su poeta!
S'abba, intantu, sighit murmuttende
cun su tempus iscurrere e surcare
in s'esser biu, e pro ite pessende,
in su mundu arcanu 'e su campare,
si debadas postu at contivizu
a tzappare terrinu rassu e friscu,
s'in ue crescher podiat su lizu
b'at naschidu laturigh'e trumbiscu.
Su semen seberadu 'e bellu ranu
est mortu suta e malerba hat tuddidu
e su pro ite abbarrat sempre arcanu
ca si l'hat sa natura costoidu.
Forsis, cun s'ogru de s'illusione
bidiat sos segretos de "zenias"
naschidos cun sa zenerassione
de imboiadas e arrancosas bias.
Mentres, a vista intrea in s'orizzonte,
b'est petzi su patire de unu Cristu
e, in s'iscunnortu, s'artesa 'e su ponte
diat cherrer medire in modu tristu.
Ma torrat prepotente su lugore
e sa mente oscurosa in tribulìa
e isparit sa nue in su colore
de s'isperantzia e sa malinconia.
Si aberit su chelu che a ispantu
de su serenu, durche sa bellesa,
e da su ponte s'intendet su cantu
de s'anima cuntenta in limpidesa.