SILENZIU

Midd'arregordu ancora, femu unu pipiu ...
issu andàda, andàda : jerru , istadi e beranu
cun d'unu bottixeddu appiccau a un'arrogh'e ispagu
chi si tragàda, sanzina sanzina, sempri in sa propriu manu .
Ghettàda su passu puntendi su carroni ... allebiu e appagu appagu
e andàda , andàda: beranu, jerru e istadi.
Ddi narànta "SILENZIU" : aici ddu zerriànta po allomingiu,
non emu scipiu mai su veru nomini e, nemmancu , cali fiat s'edadi:
leggiu, bruttu, nieddu, cun sa facci chi pariad'unu stromingiu
e andàda, andàda, fessit frius, basca, oppuru, ben tu .. .
longu, cirdinu e derettu, andàd'a passu cadenzau ... a tastu a tastu
is ogus affungaus, attesu attesu e a su scurìu e su turmentu
che duas mariposas a billai unu camminu chi non lassàd'arrastu .
E andàda , andàda : mengianu e notti, a luxi o a scurìu,
mal'attrossau: a pill'e peddi portàd'unu cappottu de sordau,
senz'e unu buttoni e chi ddi fiat strintu e curzu, totu scoloriu:
mai, po cant'est biviu, né a de dì, né a de notti, sindi fiat bogau
e andàda, andàda, in dìs de festa e in dìs de pasiu.
Sa barba e is pilus arruffaus a dd'inguamissai sa cara de brebei.
Furriàt tottu sa bidda: de sus a basciu, senz'e pressi, adasiu
senz'e nai unu fueddu, brobottendi abellu e ... in sèi in sèi
e andàda, andàda ... cun cuddu bottixeddu zumburau ...
passàt de gecca in gecca, senz'e muscinai né mai castiàda,
sa genti ddu birìada: "Silé, appara su strexu!" allonghiat sa ma'u
e senz'e castiai, ogus calaus, sighiat sa camminada.
... fiad'unu meri de jerru, a mericeddu,
mi dd'arregordu ancora: si fiat fattu scurìu e su xelu inturriau ...
arrumbula arrumbula e stratallau de su bentu, currid'unu bottixeddu
e avatu avatu un'arrogh'e spagu, trisia trisia e totu trobeddau ...
mi dd'arregordu ancora .. . femu unu pipiu:
incurruzzau a su mur'e eresia ... unu cappottu becciu de sordau,
is brazzus pendi pendi, duas martposas istudadas e a iscurìu
una manu siddada, senè bottixeddu ... mi ddui fiat accostau:
"Silè .. . Silenziu!!!" ...
Silenziu sindi fiad'andau, cumenti fiat biviu: cittìu cittìu!